Нацоски му одговори на грчкиот диригент Теодоракис: Пред 20 години немавте замерки да настапите во главниот град на Република Македонија

Благој Нацоски, македонскиот тенор и еден од најафирмираните македонски оперски пејачи во светот кој живее и работи во Италија преку социјалните мрежи му се обрати на на големиот грчки композитор Микис Теодоракис, по повод неговите денешни изјави околу спорот со името. Во обраќањето Нацоски потенцира дека е длабоко изненаден од изјавите на грчкиот композитор и се присеќа дека пред 21 година Теодоракис гостувал во Скопје каде што диригирал лично со двата македонски национални оркестри и хор. При тоа гостување во главниот град на Македонија Теодоракис го посетил и гробот на Зорба, кој се наоѓа во гробиштата во Бутел.

„Маестро Теодоракис, најискрено останав длабоко изненаден читајќи ги Вашите изјави во денешното издание на грчкиот весник „Прототема“, кои се однесуваат на проблемот што Вашата земја го има со името на мојата татковина. Моето изненадување е од повеќе причини:

– Најпрвин, од личност како Вас, признат врвен уметник во целиот свет очекував барем малку повеќе космополитизам и отвореност. Ние, музичките уметници ја имаме таа среќа да работиме една благородна професија која истовремено ни овозможува да патуваме низ целиот свет говорејќи на јазик (музичкиот) кој успева да ги сруши сите ѕидови и сите конфликти. Оваа уметност ни овозможува сите нас да бидеме обединети во едно големо семејство каде што културните разлики помеѓу народите претставуваат едно богатство на човечкиот израз“ му пишува Нацоскии на Теодоракис.

Понатаму македонскиот оперски пејач го потсетува грчкиот композтор на неговото гостување во Скопје.

„Во 1997 Вашето најпознато дело „Гркот Зорба” беше изведено во тогаш МАКЕДОНСКИОТ Народен Театар, денешна МАКЕДОНСКА Опера и Балет, заедно со МАКЕДОНСКАТА Филхармонија, во присуство на Претседателот Киро Глигоров и целокупниот државен врв на Македонија, настан пренесуван во живо од страна на МАКЕДОНСКАТА Радио Телевизија и грчката национална ТВ. Јас лично како ученик во средното музичко училиште во Скопје ги следев сите проби, а мојата мајка учествуваше во изведбата. Тогаш не се сеќавам дека имавте замерка да настапите во главниот град на Република Македонија диригирајќи лично со двата македонски национални оркестри и хор. Во таа прилика го посетивте и гробот на Зорба, кој се наоѓа во гробиштата во Бутел. Токму приказната за Зорба како историска личност и како книжевен лик, би можела да биде еден од позитивните примери и ‘адути’ за проникнувањата меѓу културите на балканските народи, но не како нов ‘мит’ туку како потстрек за барање на конструктивни решенија.

Ова мое обраќање кон Вас сакам да го завршам со енда мисла на авторот на книгата за Гркот Зорба, славниот грчки писател Никос Казанѕакис, која гласи: „Едно време ги делев луѓето на Бугари, Турци, Македонци и Грци, сега ги делам на добри и лоши. А еден ден и тоа нема да го правам, затоа што сите заминуваме во една иста почва…“ му напиша Нацоски на Теодоракис.