Академијата ФМП стави крај – Ѓорѓи Кочов повеќе не е тренер на МЗТ Скопје Аеродром

ИЗВОРСкопје24
|

Ѓорѓи Кочов од денеска не е тренер на МЗТ Скопје Аеродром, откако со управата на клубот се договори за прекин на договорот со взаемна согласност, по вчерашниот неочекуван пораз на гостувањето кај Академија ФМП, објави официјалната страна на клубот.

Двете страни се согласија дека се потребни промени во тимот, со цел да биде остварена целта, а тоа е атак на двете домашни пехари, како и борба за највисок пласман во АБА2-лигата. Кочов на клупата на нашиот тим седна во април 2018 година на местото на Жељко Лукајиќ, откако неколку месеци претходно, во декември 2017 година, беше ангажиран како негов помошник. Тој ја освои шампионската титула во 2019 година, а беше морален шампион со МЗТ Скопје Аеродром и во 2020 година, кога беше прекинато првенството.

Нашиот клуб е горд што придонесе на македонската кошаркарска мапа да се појави млад и талентиран стручњак, кој во последниот циклус беше и дел од стручниот штаб на репрезентацијата. На Кочов му посакуваме се најдобро во кариерата, со надеж дека некогаш во иднина повторно ќе ни се вкрстат патиштата, соопштуваат од МЗТ Скопје.

Екипата од денеска ќе работи под раководство на неговиот прв помошник, Дарко Радуловиќ, кој ќе ја има улогата на привремен прв тренер се до пронаоѓањето на ново име за оваа функција.