Лифт падна од втор кат во зграда во Карпош 4, четворица завршиле на Клиника

ИЗВОРСкопје24
|

Во текот на вчерашниот ден, четири лица од Скопје биле донесени во Клинички центар, откако се здобиле со повреди при пад на лифт во зграда.

„На 05.09.2019 околу 15.40 часот во СВР Скопје било пријавено дека во Комплекс клиники „Мајка Тереза’’ биле донесени Н.М.(20), Ф.М.(20),О.Н.(21) и К.П.(21), сите од Скопје, кои, според пријавеното, на 04.09.2019 околу 21.55 часот, додека се возеле во лифт во зграда во изградба на улица „Трифун Бузев’’, лифтот паднал од вториот кат во подрумските простории.

МВР денеска соопшти дека се преземаат мерки за расчистување на случајот“, велат од МВР.

Богоев: Казни за вселување во згради без технички прием

Градоначалникот на Карпош Стефан Богоев денеска најави дека ќе се казнува вселување во станбените објекти за којшто не е направен технички прием, реагирајќи на пријавен инцидент дека се откачил лифт со четири лица во него во зграда во оваа општина, а која што, како што вели, се уште не е впишана во катастарот.

Богоев информираше дека по добивање на информацијата општинските служби излегле на терен и ќе има санкции за инвеститорот.

– Информацијата што ја имам јас е дека станарите пријавиле во полиција. Дискутабилно е дали може да се наречат станари бидејќи кога не е впишана зградата, немате имотен лист и нема технички прием е проблем и верувам дека полицијата и нашите инспекциски служби ќе преземат активности и ќе биде санкциониран пред се инвеститорот изведувачот бидејќи е недозволиво тоа да се прави, изјави Богоев, одговарајќи на новинарски прашања по присуството на предавање за сајбер бебзедност во општинското основно училиште „Петар Поп Арсов“.

Како што дополни, знае дека тоа се прави секаде во државата и оти граѓани се вселуваат во објекти најчесто со лист за предбележување.

– Ја користам оваа прилика да ги предупредам и граѓаните и инвеститорите дека вселување во објект кој уште се води како градилиште и не е впишан во Катастар и нема технички прием е казниво со закон и ќе се казнува. Ваквите настани само ќе предизвикаат и ние и полицијата и Државниот градежен инспекторат да сме поприсутни на терен и да санкционираме, да не биде потоа дека инвеститорот или станарите не знаеле бидејќи имаат одговорност. Едноставно не можат да живеат во објект што не е ставен во функција, истакна Богоев.