Не дозволуваат ниту да не пофалат: Политички замерки ја натераа Сара Џесика Паркер да го избрише името на земјава и ги затвори коментарите за „Медена земја“

ИЗВОРСкопје24
|

Сара Џесика Паркер објави пост во кој им препорачува на сите да го изгледаат македонскиот филм Honeyland (Медена земја) кој се емитува во Њујорк.

Но, наместо нејзината намера да биде добро сфатена и прифатена, таа стана мета на критики од политички карактер.

„Медена земја – восхитувачка, неверојатна, интимна а сепак епска приказна за пчеларката Хатиџе Муратова. Жена која нема да ја заборавам. Постои добра причина зошто филмот ја добива секоја награда за документарец.

Честитки за режисерите Љубомир Стефанов и Тамара Котевска и ви благодарам што ни овозможивте визуелно патување до малото селце во Република Македонија. Моментално се емитува во Њујорк, чувствувам дека ќе биде номиниран за Оскар!“ – стои во објавата на нејзиниот Инстаграм.

Како што може да претпоставите, она за што беше критикувана е недостигот на „Северна“ во името, а многумина го занемарија фактот дека нејзината намера е да им препорача на сите да го изгледаат филмот, а не да навлегува во политички конфликти.

„Името на земјата е променето во Република Северна Македонија/Македонија е грчка/Смени го името во Северна Македонија“ беа дел од коментарите на корисниците кои ја нападнаа актерката, по што таа им се извини за грешката и во објавата додаде „Република Северна Македонија“.

Сепак, очигледно и тоа не било доволно за луѓето да престанат да ја критикуваат и да обрнуваат внимание на нејзината грешка, па актерката беше приморана да ги исклучи коментарите, целосно да го тргне името на нашата земја од нејзината објава и да објасни зошто го направила тоа.

„Има премногу дискусии за овој пост. Поточно, за името на земјата. Мојата цел беше да привлечам што поголем дел публика за оваа неверојатна приказна и документарец. Не заземам политичка позиција бидејќи не сум доволно информирана. Ќе се потрудам да научам повеќе, а се надевам дека вие ќе се потрудите да бидете дел од публиката на Медена земја.“

Па така сега, очигледно за многумина е подобро да не стои ништо за земјата, отколку старото име на земјата, што беше ненамерна грешка на актерката.