Почна вториот циклус на Програмата за професионална обука за менаџмент на квалитет и конкурентност

ИЗВОРСкопје24
|

Денеска почна вториот циклус на Јапонска менаџмент програма за професионална обука „Quality management and Competitiveness – Менаџмент на квалитет и конкурентност”,на Економскиот факултет на Универзитетот Св. Кирил и Методиј во Скопје, поддржана од страна на Јапонската агенција за меѓународна соработка – ЏАЈКА (JICA).

Оваа програма ќе биде спроведена во непосредна и посветена соработка со Економскиот Факултет – Скопје при УКИМ, Универзитетот од Нагасаки, Јапонија, како и Универзитет за национално и светско стопанство (УНСС), Бугарија.

Официјалниот настан на започнување на програмата ќе се одржи онлајн, во присуство на претставници од трите универзитети, претставници на амбасадите на Јапонија во Скопје и Софија и амбасадата на Бугарија во Скопје, како и останати респективни гости, соопшти Џајка.

Во својата суштина, Програмата за професионална обука е посветена на креирање на уникатна менаџмент филозофија со користење на многубројните јапонските методи, техники и деловни стандарди на јапонската деловна култура на континуирано подобрување на квалитетот. Како и при успешната реализација на првата генерација на Програмата за професионална обука, и во нејзината втора генерација, фокусната развојна цел претставува дијалектичко и интерактивно развивање на креативното размислување во функција на решавање на многубројните менаџмент проблеми, унапредување на апликативните знаења, вештини, искуства и способности за дијагноза, анализа и успешно решавање на континуираните менаџмент предизвиците, во услови на константни и турбулентни промени во бизнис опкружувањето.

Програмата е структурирана низ 11 апликативни дисциплини од пошироката област на менаџментот, со активно учество на професори од Јапонија, Бугарија и Северна Македонија, а ќе се имплементира во периодот од јануари до април годинава. Целните групи на програмата се сопственици на бизниси и/или менаџери на мали и средни претпријатија, иноватори, претприемачи, претставници на државна и јавна администрација, како и воопшто сите професионалци кои се ориентирани кон следење и примена на најновите трендови во менаџментот на квалитетот, а целосно во насока на континуирано подобрување на квалитетот и конкурентноста на бизнисот.